Мексиканскиот фудбал е обвиен во црно по веста за ненадејната смрт на Пабло Хурадо Серафин, поранешен голман на Депортиво Толука, кој почина на 22-годишна возраст.
Трагедијата ја потресе јавноста таму, но и неговиот матичен клуб, каде што се искачи низ младинските редови по пристигнувањето во 2019 година. Серафин бараше нов клуб од летото 2024 година, кога стана слободен агент. Веста за неговата смрт беше потврдена само неколку дена откако го прослави својот 22-ри роденден.
Депортиво Толука се прости од својот поранешен член со трогателна изјава:
- Сите ние во Депортиво Толука длабоко жалиме за смртта на Пабло Хурадо Серафин, поранешен голман на нашата институција. Изразуваме најдлабоко сочувство до неговото семејство и пријателите во ова тешко време – се вели во соопштението на клубот.
Серафин се сметаше за „клучен дел“ од младинската академија на Толука, играјќи за тимовите до 17, до 20 и до 23 години. За време на неговиот развој, тој помина кратко време и во клубот Вале де Браво, пред да се врати во својот „фудбалски дом“.
Сепак, и покрај неговиот голем талент, тој не успеа да дебитира за првиот тим, а клубот му дозволи да бара нова средина по завршувањето на праксата во младинските објекти.
Микел Ариола, претседател на Мексиканската фудбалска федерација (Лига МХ), исто така проговори за оваа трагедија, и го испрати последното збогум на младиот човек преку социјалните мрежи. Причината за смртта на младиот голман сè уште не е официјално објавена за јавноста.