Обвинетите полициски службеници Мартин Арсовски и Дарко Милошевски не биле однапред известени дека ќе учествуваат во контрола на кочанската дискотека „Пулс“, ниту пак им биле соопштени конкретните задачи пред да пристигнат во Кочани. Ова на денешното судско рочиште го изјави сведокот Драган Василески, виш инспектор за економски криминалитет во ОВР Пробиштип.
Одговарајќи на прашања на одбраната, Василески посочи дека од тогашниот началник на ОВР Пробиштип добил наредба да предложи двајца инспектори за ангажман на подрачјето на ОВР Кочани, при што им било кажано во 20:30 часот со службено возило да се јават на бензинска пумпа во Кочани. Според него, ниту тој, ниту обвинетите не знаеле какви активности ќе извршуваат, не им било наложено да носат униформи, ниту биле запознаени со оперативен план или можни ризици.
Сведокот додаде дека пред трагедијата воопшто не слушнал за дискотеката „Пулс“, а истото важело и за неговите колеги. Според разговорите што ги имале по пожарот, Арсовски и Милошевски првично биле распоредени на други локации, а околу 2:30 часот по полноќ заедно со полицајци од Кочани влегле во дискотеката за да проверат лице осомничено за поседување дрога.
При проверката во близина на тоалетите била пронајдена сомнителна материја, а на излегување забележале дека гостите почнуваат да го напуштаат објектот и настанува метеж.
Во паузата од судењето, во име на родителите на загинатите се обрати Александар Наунов, кој изрази незадоволство од сведочењата за усни наредби и недоволна информираност меѓу службите, нагласувајќи дека секое рочиште за семејствата значи повторно преживување на трагедијата.
„Дали навремена координација, професионално постапување и организирање коридор за евакуација можеле да спасат животи“, праша Наунов, додавајќи дека семејствата ги преживуваат најтешките моменти од својот живот.
Во судскиот процес за пожарот во дискотеката „Пулс“ на 16 март 2025 година, во кој животот го загубија 63 лица, обвинети се вкупно 13 полициски службеници за непостапување согласно службените обврски и акцискиот план.