Судскиот процес за пожарот во кочанската дискотека „Пулс“, една од најтешките трагедии во поновата македонска историја, продолжува денеска во судницата во Идризово. Пред Судот ќе бидат изнесени нови искази на сведоци предложени од Обвинителството, со што продолжува доказната постапка.
Трагедијата се случи на 16 март 2025 година, за време на настап на музичката група „ДНК“. Во огнената стихија животот го загубија 63 лица, а повеќе од 200 беа повредени, што го прави ова судење исклучително комплексно и значајно за јавноста.
На претходното рочиште, вниманието беше насочено кон сведочењата на Ана Захариева, која кобната вечер била гостинка во дискотеката, како и на поранешниот главен секретар на Општина Кочани, Александар Јосифов (во мандатот на градоначалникот Николчо Илиев) и вработениот во општината, Драган Ананиев.
Истовремено, одбраната на првообвинетиот и сопственик на „Пулс“, Дејан Јованов-Деко, поднесе барање за замена на мерката притвор со куќен притвор, приложувајќи аргументи за влошена здравствена состојба на обвинетиот.
Судскиот процес го следи тим од 15 јавни обвинители, кои ја застапуваат оптужницата. Очекувањата се дека доказната постапка со сослушување на сведоци ќе продолжи со несмалено темпо и во наредните рочишта, со цел да се расветлат сите околности што доведоа до катастрофата.