Во судницата во Идризово денеска продолжи судскиот процес за пожарот во дискотеката „Пулс“ во Кочани, во кој на 16 март 2025 година животот го загубија 63 лица, а преку 200 беа повредени. Обвинителството, застапувано од тим од 15 јавни обвинители, презентираше опсежна медицинска документација и вештачења кои ја отсликуваат тежината на трагедијата.
Обвинителката Наташа Сарамандова пред судот ги изведе вештачењата за:
- 157 лица со тешки телесни повреди;
- 65 лица со телесни повреди.
Според доказите, повредените се соочиле со тешки последици, вклучувајќи:
- Интоксикација и повреди од вдишување штетни гасови;
- Изгореници од 6% до 30% од површината на телото (лице, раце, грб);
- Оштетувања на дишните органи и респираторна слабост;
- Скршеници на градни пршлени, скршени ребра и нагмечувања.
Обдукциски наоди за смртните случаи Пред презентирањето на повредите, Обвинителството ги изведе обдукциските наоди од Институтот за судска медицина. Резултатите покажуваат дека за мнозинството жртви (59 лица), смртта била насилна и настапила како резултат на труење со јаглерод моноксид. Кај останатите, смртта била предизвикана од задушување (притисок врз градниот кош или недостаток на кислород), акутна слабост на белите дробови или изгореници од трет степен.
Одбраната реагираше на начинот на изведување на доказите, истакнувајќи дека се врши „читање на листата“, а не конкретно изведување на доказите.
Судењето, кое го води судијката Дијана Груевска Илиевска, продолжува на 4 мај, кога се очекува сослушување на вешто лице од Судска медицина за разјаснување на клучните аспекти од обдукциските мислења.