Дафина Стојаноска, пратеничка во Собранието и член на ИК на ВМРО-ДПМНЕ, гостуваше во емисијата “Заспиј ако можеш” на телевизија Алфа, каде говореше за јавно изнесените ставови на лидерот на опозициската СДС, во однос на уставните измени. Според неа, тој настапува гласно, и на домашна, и на меѓународна сцена, воден исклучиво од амбицијата да дојде на власт. Стојаноска оцени дека станува збор за трет во низата лидери на СДС, кој е подготвен на се за да дојде на власт, а од друга страна пак можеби ова и да претставува негов обид за спас од одговорност и криминал. Таа истакна и дека на СДС не им одговара фактот што повеќе ги немаат нивните, според неа, инсталирани кадри во судството кои постапуваа по нивни насоки, како и дека, и по два изборни порази, не ја разбираат пораката што им ја испратиле граѓаните.
,,Тоа е еден лик којшто, како на отворена, и на домашна, и на меѓународна сцена, буквално се “подава”, па вели дека нема проблем да направи уште една уставна измена. Нешто слично правеше и неговиот претходник Заев“, вели Стојаноска.
Според неа, лидерот на опозициската СДС е третиот во низата, кој е подготвен да направи сѐ за да дојде на власт и, како што вели таа, да го стави истиот печат, како неговите претходници.
,,Ова е лик, трет во континуитет, откако започна Заев со предвавства, Ковачевски ги надгради или го потпиша вториот срамен договор, и овој останува да го “стави печатот”, ако може така да кажеме, па се “подава” на секому, само за да дојде на власт. Или, можеби, доаѓањето на власт за него значи спасување од криминалот?“, рече Стојаноска.
Стојаноска посочи дека на Филипче не му одговара тоа што повеќе ги нема нивните инсталирани кадри во правосудниот систем кои претходно, како што вели, работеле по нивен налог.
,,Тие се свесни, тие знаат дека се криминогени до преку глава, знаат дека се менуваат работите во судството, веќе ги нема нивните инсталирани луѓе, кои што работеа според нивните налози, и ајде сега ќе го релативизираме криминалот“, кажа Стојаноска и дополни:
,,Ако криминалот беше симбол на нивното владеење, сега доаѓа власт која што апсолутно не е ортак со криминалците. Имаме примери каде што со доказ фатени луѓе кои што, ете, за овој период се дрзнале да бидат криминалци, веднаш се обелоденети“.
Стојаноска вели дека Филипче е дел од истата матрица, онаа која го потценувала сопствениот народ и дури и по два изборни порази не ја сфати пораката која народот му ја упати нему и на СДС.
,,Не случајно Филипче толку брзо, толку гласно, толку напорно, се обидува да се “подаде”. Самиот се пријави, нудејќи дека ќе го сменат Уставот, ќе направат сѐ што ќе им се каже, само за да се заштитат од одговорност за нивниот криминал. Тоа е таа матрица која што го потценуваше сопствениот народ и сега тука се случуваат контрадикторности“, истакна таа и додаде:
,,Не ја сфати пораката од народот и него повеќе му е грижа за избори во некои други земји. Не покажува грижа за тоа што нему народот му го порача и на последните парламентарни, и на последните локални избори. Два пати по ред добива порака од народот и тој повторно го потценува мислењето на сопствениот народ“.