Стоилковски: Гоце Делчев и јазикот не смеат да бидат дел од преговорите

Заев зошто молчиш со денови и не кажуваш, кој е твојот став за Гоце Делчев и за македонскиот јазик? Ајде Заев охрабри се и не се плаши, кажи го твојот став Македонија да го слушне. Заев не се криј зад празни флоскули и општи поими, Македонија очекува став.

Ова денеска на прес-конференција во партиското седиште го истакна портпаролот на опозициската ВМРО-ДПМНЕ, Наум Стоилковски.

-Нели сите проблеми со соседите беа решени? Нели немаше веќе отворени прашања со соседите? Нели договорот што го потпиша со Бугарија беше гарант за нашата европска иднина? Од каде сега нови декларации и анекси на договорот? Се што кажа Зоран Заев пред три години кога го потпишуваше договорот со Бугарија беше лага и дел од една фаза на систематско рушење на нацијата. Вчерашната изјава дека е можна нова декларација која што ќе биде дополнување на договорот е разградување на нацијата и историјата на државата. Наместо раст и развој. Зоран Заев повторно се впушта во историски договори, кои немаат никаков ефект врз суштински развој на државата. Наместо да се насочи кон унапредување на соработката и економски развој ние сме заглавени во теми за кои не треба да се преговара и кои се дел од македонската национална гордост, вели Стоилковски.

Според него, Гоце е црвената линија на македонското национално достоинство и за него не смее да има преговарање, исто така и за македонскиот јазик, за кој што, како што рече, Заев тврдеше дека е загарантиран со договорот кој го потпиша со Грција.

-Очигледно e се што кажа Заев е лага и на секој нови преговори, тој руши дел по дел од македонското ткиво. Заев треба да знае дека се што ќе потпише, а ќе значи продажба на Гоце Делчев и на македонскиот јазик, ќе биде поништено од владата на ВМРО-ДПМНЕ и ние таков договор нема да почитуваме, рече Стоилковски.