Градоначалникот на Општина Гази Баба, Бобан Стефковски ги информира жителите на Автокоманда дека е донесено Решение за утврдување на режим на сообраќај во Автокоманда. Со ова официјално се одобрува воведувањето на зонско паркирање.
„Решение кое жителите на Автокоманда го очекуваат повеќе од една деценија. Во моментов интензивно се работи на изработка на проектот за обележување на улиците и поставување на потребната сигнализација, а активностите на терен ќе започнат во најкус можен рок“, истакна Стефковски.
Како што посочи тој во објавата, она што е од особена важност, е тоа што секое домаќинство ќе добие две бесплатни картички за паркирање, со што се обезбедува правична распределба и приоритет за жителите.
„Ова не е изолиран чекор, туку дел од поширока и стратешка политика која ја водиме со јасна цел – системско решавање на секојдневните проблеми на граѓаните, со фокус на: Урбанистички и сообраќајни решенија, Подобрување на инфраструктурата, Поголема безбедност и ред во јавниот простор и Активна комуникација со жителите“, објаснува Стефковски.
Тој воедно додаде дека работат плански, транспарентно и одговорно, со директна вклученост на граѓаните во процесот на креирање приоритети.
„Преку теренски посети, средби со месните заедници и континуирано следење на реалните потреби, изготвуваме конкретни решенија, како што е и ова со зонското паркирање – решение кое директно ќе влијае на квалитетот на животот во Автокоманда, истакна Стефковски.