Претседателот на Сојузот на синдикати на Македонија (ССМ), Слободан Трендафилов, денеска ја најави втората фаза од синдикалниот отпор. Утре, точно во 12 часот, синдикалците ќе ја блокираат раскрсницата пред Стопанската комора, Организацијата на работодавачи и Бизнис-конфедерацијата, во знак на револт поради игнорирањето на работничките барања.
Клучните барања на ССМ остануваат непроменети: итно зголемување на минималната плата на 600 евра и линеарно зголемување на сите останати плати за 6.000 денари.
„Пред Стопанската комора ќе блокираме газди кои ги блокираат работниците 36 години, газди кои одбија да ги зголемат платите, а кукаат дека квалификуваните работници им заминуваат. Нема да дозволиме работниците да мрзнат на улица за газдите, пратениците и Владата да ги блокираат нивните права“, порача Трендафилов.
Блокадата ќе биде спроведена со законскиот минимум од 21 претставник, но Трендафилов најави дека ова е само вовед во масовен работнички протест со организиран превоз од сите градови низ државата.