Полицискиот билтен изминатото деноноќие бележи несекојдневен случај на компјутерски криминал во кој главен актер е ученик во средно училиште од Прилеп. ОВР Прилеп веќе поднесе известување против малолетникот поради основи на сомнение за сторено кривично дело „компјутерски фалсификат“.
Според информациите од Министерството за внатрешни работи, пријавениот лажно се претставил како наставник по англиски јазик од основно училиште во Виница и стапил во контакт со вработена во Министерството за образование и наука (МОН). Сметајќи дека комуницира со вистински наставник, таа му креирала официјална електронска адреса, му ги доделила лозинките од Е-дневникот како администратор од нејзината корисничка сметка и му наложила да ги координира останатите наставници.
На овој начин, средношколецот добил пристап до податоците на сите професори на ниво на државата. Измамата траела сè додека поранешната в.д. директорка не го информирала дека некој ги брише податоците од дневникот во нивното училиште. Откако бил откриен, тој ги избришал сите лажни профили од социјалните мрежи и службениот мејл за да ги прикрие трагите.