Средба со Светска банка: Народната банка соодветно реагира на ценовните притисоци

Народната банка соодветно реагира на притисоците кои од меѓународните пазари на примарни производи, односно основни прехрамбени производи и енергенти, се пренесуваат на домашните цени и нагорно ја придвижуваат инфлацијата. Неизвесноста и понатаму останува висока, оттаму Народната банка и понатаму треба да продолжи да ги следи меѓународните и домашните движења и доколку е потребно, соодветно да реагира. Ова беше посочено на средбата меѓу гувернерката на Народната банка Анита Ангеловска-Бежоска, директорката на Светска банка за Западен Балкан Шиаочинг Ју и директорот на Светска банка за земјава Масимилијано Паолучи.

На средбата, како што соопшти Народната банка, се разговараше за есенските макроекономски проекции на Народната банка, кои предвид го земаат влошениот глобален амбиент, како резултат на натамошните геополитички тензии од воената инвазија на Русија врз Украина, пандемијата на Ковид-19 и дополнителните притисоци врз цените на светските пазари на примарни производи.

-Согласно ова, во октомвриските проекции на Народната банка инфлацијата е ревидирана нагоре, во услови на нагорни корекции на оцените за увозните цени, односно на 14,3 отсто. За следната година се очекува намалување на увозните цени, со што би се намалиле и притисоците врз домашната инфлација и во отсуство на поголеми притисоци од побарувачката се очекува дека просечната стапка на инфлација ќе биде поумерена, односно 8-9 отсто. Очекувањата на среден рок се дека инфлацијата значително ќе забави, сведувајќи се на 2,4 отсто во 2024 и ќе се врати на историскиот просек од 2 отсто во 2025 година, се вели во соопштението.

Гувернерката на Народната банка истакна дека нашата е во редот на централните банки кои први реагирале на глобалните инфлаторни движења, односно кон крајот на 2021 година, со повлекување на ликвидност преку интервенции на девизниот пазар. Понатаму, неколкупати е покачена основната каматна стапка со вкупен ефект на раст од 3 процентни поени. Покрај ова донесени се и повеќе мерки, како промените во задолжителната резерва во насока на денаризацијата, како и поддршка на проекти за енергетска одржливост, но и воведување на контрацикличен заштитен слој на капитал кај банките. 

03.12.2022 - 10:50

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега