Општина Кисела Вода вечерва организира бесплатна полуматурска забава за деветтоодделенците под мотото „Спремни за средно!“, наменета за сите ученици кои го завршуваат основното образование во општината.
Настанот ќе се одржи со почеток во 20:00 часот во спортската сала „Независна Македонија“ при ООУ „Невена Георгиева Дуња“ и ќе трае до 23:30 часот. Се очекува околу 560 ученици да присуствуваат и заеднички да го одбележат крајот на деветгодишното образование.
За забавниот дел се предвидени настапи на музичкото дуо 2Bona и диџеј Марио Трампет, како и настапи на самите ученици.
Од Општината истакнуваат дека ова е втора година како се организира ваква заедничка и бесплатна полуматурска прослава, а концептот за годинашниот настан е изработен врз основа на предлозите на учениците.
Градоначалничката Бети Стаменкоска Трајкоска, која претходно се сретнала со претставници на деветтоодделенците од сите училишта, посочи дека целта е младите директно да учествуваат во креирањето на настанот.
– Општина Кисела Вода ги третира младите како сериозни соговорници чие мислење мора да се вреднува. Нашата задача е да им дадеме простор да одлучуваат за прашањата што ги засегаат и да овозможиме нивните идеи да станат реалност – изјави Стаменкоска Трајкоска, нагласувајќи дека се очекува учениците да создадат убави спомени пред да започнат новата етапа во образованието.