Спасовски за протестите: Да се почитува забраната за собири за да не се загрозува здравјето

Министерот за внатрешни работи Оливер Спасовски денеска апелираше до опозицијата која најави протести во Куманово, Тетово, Кавадарци, Прилеп, Битола и Охрид, да ја почитува забраната за јавни собири, пред сѐ за заштита на здравјето.

„Апелирам, ако има забрана за јавни собири и протести, тогаш да не го правиме тоа и од здравствени причини“, рече денеска Спасовски на прес-конференцијата.  

Одговарајќи на новинарско прашање како заканите од некои опозициски лидери влијаат врз безбедноста во земјата, Спасовски рече дека безбедносната состојба во земјата е стабилна, без никаква опасност за нарушување на јавниот ред и мир, дека заканите од лицата од опозициските партии се следат, но тоа не претставува никаков проблем за јавниот ред и мир.