Советот за безбедност на Обединетите нации утре ќе одржи итен состанок поради одлуката на Израел да го признае Сомалиленд како независна држава, потег што предизвика силни реакции на меѓународната сцена, јавува германската агенција ДПА.
Во пресрет на седницата, 21 земја, претежно со муслиманско мнозинство, доцна синоќа објавија заедничка изјава во која предупредуваат на „сериозни последици“ од израелската одлука врз мирот и безбедноста на Рогот на Африка, како и поширокиот регион на Црвеното Море.
Сомалиленд, регион во северниот дел на Сомалија со неколку милиони жители, иако формално не е меѓународно признат, функционира како де факто независна територија повеќе од три децении. Израел во петокот стана првата држава што официјално ја призна неговата независност, што беше остро осудено од сомалиската Влада и од повеќе регионални партнери.
Одлуката на Израел доаѓа само неколку дена пред Сомалија да го преземе ротирачкото претседателство со Советот за безбедност на ОН, што дополнително ја зголеми дипломатската тензија, пренесува ДПА.
Во заедничката изјава, објавена од Катар, 21 земја го истакнаа своето „недвосмислено отфрлање“ на израелскиот потег, оценувајќи дека тој претставува „сериозно кршење на принципите на меѓународното право“. Во документот се осудуваат и „обидите за насилно протерување на палестинскиот народ од нивната земја“, по наводите дека признавањето е поврзано со планови за преселување на Палестинците од Појасот Газа.
Шефот на дипломатијата на Сомалиленд, Абдирахман Дахир Адам, изјави за израелската телевизија Канал 12 дека признавањето нема никаква поврзаност со конфликтот во Газа, потсетува ДПА.
Од кабинетот на израелскиот премиер Бенјамин Нетанјаху соопштија дека одлуката е донесена „во духот на Авраамовите договори“, со кои неколку арапски држави воспоставија формални односи со Израел. Весникот „Тајмс оф Израел“ забележува дека Обединетите Арапски Емирати, Бахреин и Мароко, иако дел од Авраамовите договори, не се меѓу потписниците на заедничката изјава со која се осудува признавањето на Сомалиленд.