Сопругата на Бектеши: Тој не е причина за пожарот, сакаат да ги скријат правите виновници

Илка Каба Бектеши, сопруга на Крешник Бектеши на кој му е одреден 30 дневен притвор за пожарот во дискотеката Пулс во Кочани, каде загинаа 59 лица, додека повеќе од 160 се повредени, се огласи на социјалните мрежи. 

Според нејзините зборови, ексминистерот за економија не бил уапсен туку отишол во станица по добиена покана, по што го пуштиле дома, но откако се подготвил да излезе од станица, му кажале дека му одредуваат 24-часовна мерка. 

- „По 3 минути подготвување за заминување, најавуваат дека одредуваат 24-часовна мерка, без никакво предупредување или присуство на бранител, го земаат Крешник со врзани раце за да го испратат во Кочани. Едно нешто што треба да се увери е дека не може да се одвлече вниманието на луѓето од вистинските виновници. За да се добие согласност од Министерството за економија, прво потребна е согласност од општина Кочани, Министерството за транспорт, Министерството за внатрешни работи, Пазарниот инспекторат и на крајот Министерството за економија. Медиумските наслови дека поранешниот министер е уапсен се оттргнување на вниманието од вистинските виновници, непочитување на медиумите кои по секоја цена ја пренесуваат вистината. Ви определиле 48-часовен притвор за мерка „Тешко дело против општата безбедност“, првично без правна основа. Крешник ниту бил причина за пожарот, ниту бил на должност во моментот кога се случила трагедијата. Се очекува да се додадат уште 48 часа затоа што треба да добијат време за да ја префрлат вината на Крешник, но ова нема да помине бидејќи вистината е кај Крешник. Тие политичари што демек не претставуваат само со албанско име ви кажуваат дека делата се веќе познати. Синоќа мојот адвокат ме извести дека обвинителот побарал затворска казна од 30 дена за Крешник. Сега сè почнува за мене како сопруга, како мајка на децата на Крешник… израснавме еден до друг во секоја димензија, ова ќе биде само предизвик уште еднаш да си докажеме еден на друг дека сме го направиле вистинскиот избор. Држи ја главата високо, Крешник“, напиша сопругата на ексминистерот.

Инаку, Основниот суд во Кочани донесе решение со кое се определува 30 дневен притвор за 13 лица опфатени во случајот со пожарот во дискотеката „Пулс“, меѓу кои и за поранешниот министер за економија Крешник Бектеши. 

Обвинителството и полицијата синоќа спроведоа акција за приведување на лица за кои постои сомнение за инволвираност во пожарот, за што Јавното обвинителство најави дека денеска ќе информира.

Со истражните активности до пред приведувањето на тројцата поранешни градоначалници беа опфатени 28 лица.

Веќе е отворена истрага и е определен 30-дневен притвор за седум службени лица, вработени во СВР Штип и ПСОН Кочани, кои се осомнични дека како соизвршители,  изготвувајќи, потпишувајќи и одобрувајќи позитивна согласност, му овозможиле на правно лице да се стекне со лиценца за вршење угостителска дејност – кабаре иако објектот не ги исполнувал законските услови за работа.