Проектот „AgriSHIFT – одржливо земјоделство“, кој започна во јануари 2026 година и ќе трае до септември 2028 година, предвидува поддршка за најмалку 50 земјоделци и нивните семејства, обука за 40 земјоделци за климатски паметни практики, формирање на четири демонстративни парцели за тестирање и прикажување практики за ефикасно користење вода, подобрување на почвата и климатски отпорно земјоделство, микро-грантови за 12 земјоделски иницијативи, финансиска поддршка за почнување на четири бизниси управувани од жени и формирање земјоделска задруга со најмалку 40% жени.
Активностите се реализираат во три речни сливови: Вардар, Струмица и Црн Дрим, во општините Гевгелија, Богданци, Валандово, Струмица, Радовиш, Василево, Босилово, Струга, Вевчани и Дебар.
Целта на проектот е да ја поддржи земјоделската заедница во справувањето со последиците од климатските промени преку современи и одржливи практики.
Проектот е финансиран преку програмата за меѓународна развојна соработка на Република Словенија, со дополнително кофинансирање од локалниот партнер и други придонеси од вклучените организации. Го води Форумот за праведен развој (FER) од Словенија, а во Македонија го спроведува Милиеуконтакт Македонија (MKM).
Иницијативата доаѓа во време кога земјоделството се соочува со зголемени суши, нерамномерна распределба на водните ресурси и ограничен пристап до современи технологии, особено за жените и младите во руралните средини. Проектот обезбедува директна поддршка преку обуки, менторство и финансиска помош за зголемување на продуктивноста и отпорноста на фармите, како и активности за унапредување на родовата еднаквост и економско зајакнување на жените.
„AgriSHIFT“ има за цел да поттикне премин кон одржливо и климатски отпорно земјоделство преку подобро управување со природните ресурси, трансфер на знаење и развој на нови економски можности за руралното население, велат од MKM.