Во пресрет на официјалниот почеток на проектот „Скопје – Европска престолнина на културата 2028“, градоначалникот на Скопје, Орце Ѓорѓиевски, денеска оствари работна средба со Антонио Николетти, градоначалник на италијанскиот град Матера.
На средбата, како што информираше Ѓорѓиевски, се разговарало за потенцијалите на двата града, размената на искуства и поставувањето на темелите за идни партнерства кои треба да придонесат за развој на Скопје. Оваа средба се случува еден ден пред утрешниот голем меѓународен настан, кој ќе го означи официјалниот почеток на чествувањето на титулата Европска престолнина на културата.
„Овој процес носи нова енергија, визија и трансформација – културна, дигитална и инфраструктурна, а сѐ во интерес на сите наши граѓани“, истакна Ѓорѓиевски на својот Фејсбук профил.
Скопје утре ќе биде домаќин на бројни европски лидери и градоначалници, што претставува потврда за значењето на градот на европската мапа. Според градоначалникот, со овој проект се започнува нов развоен циклус базиран на долгорочни инвестиции и стратешка соработка. Ѓорѓиевски порача дека она што некогаш било заглавено, денес добива конкретна форма, а Скопје сигурно чекори кон создавање на модерна и просперитетна метропола.