Синдромот Кавасаки откриен кај починатото бебе од ковид-19 во Албанија

Во Албанија, вчера, меѓу 15-те починати од ковид-19 беше и 16-месечно бебе, јави дописничката на МИА од Тирана.

Во официјалното соопштение, Министерството за здравство и социјална заштита објави детали за смртта на бебето, споменувајќи ретка болест што ја влошила состојбата на детето.

Од таму потврдуваат дека детето починало како последица на ковид-19 и оти било следено и третирано во ковид центарот во Клиниката за педијатрија, каде биле утврдени и клинички знаци на синдромот Кавасаки.

„Неговата состојба се влошила во рок од 24 часа и потоа беше испратено на интензивна терапија каде што, и покрај лекувањето со целосна терапија за третман и напорите на лекарите за реанимација, не можеше да преживее, како резултат на компликација (Мултисистемски воспалителен синдром), меѓу најретките компликации што се среќаваат кај децата како резултат на ковид -19“, соопшти Министерството.

Во Албанија вчера вирусот ковид-19 беше дијагностоциран кај 836 лица, што е највиска бројка на заразени во еден ден, починаа 15 лица, исто така највиска бројка досега, додека во списокот на оздравени беа впишани 490 лица.