Претседателката Гордана Сиљановска-Давкова денеска ќе ја пречека претседателката на Република Индија, Друпади Мурму, која ќе престојува во дводневна официјална посета на Македонија.
За индиската претседателка ќе бидат организирани највисоки државни и воени почести на свечена церемонија во Кабинетот на претседателот. По официјалниот пречек, предвидени се тет-а-тет средба меѓу двете претседателки, пленарен состанок на македонската и индиската делегација, како и заедничка прес-конференција.
Во рамки на посетата, Мурму ќе положи венец на гробот на Гоце Делчев во црквата „Свети Спас“ во Скопје.
Индиската претседателка ќе се сретне и со претседателот на Собранието, Африм Гаши, ќе се потпише во Книгата на впечатоци и ќе им се обрати на пратениците во македонскиот парламент.
Попладне ќе се одржи македонско-индиски бизнис форум, организиран од Кабинетот на претседателот во соработка со Директоратот за економска дипломатија при Министерството за надворешни работи и надворешна трговија. На форумот, на кој ќе се обратат Сиљановска-Давкова и Мурму, ќе бидат презентирани инвестициските можности што ги нуди земјава.
Вториот ден од посетата е предвидена обиколка на Спомен-куќата на Мајка Тереза и Музејот на град Скопје, каде што ќе присуствуваат на церемонијата на откривање биста на Махатма Ганди. Потоа двете претседателки ќе отпатуваат во Охрид, каде што ќе го посетат манастирскиот комплекс „Свети Наум“, како и неколку манастири и цркви во старото градско јадро.
Поради официјалната посета на индиската претседателка, во поширокото централно подрачје на Скопје ќе биде воведен посебен сообраќаен режим. Од СВР Скопје апелираат до граѓаните да ги почитуваат насоките и наредбите на полициските службеници.