Претседателката на државата, Гордана Сиљановска-Давкова, упати официјална честитка до припадниците на влашката заедница по повод 23 Мај – Националниот ден на Власите.
Во своето обраќање, таа стави посебен акцент на историскиот континуитет, зачувувањето на јазикот и идентитетските карактеристики на овој народ.
„Вие припаѓате на древната духовна лоза на балкански народи, чие историско опстојување не е врзано за моќ и граници, туку за јазикот, меморијата и свеста за посебниот влашки идентитет.“
Претседателката потенцираше дека истрајноста и духовното достоинство на Власите се пренесувале низ генерациите и покрај сите историски премрежија.
„Во влашкиот јазик, традиција и култура се вткаени вековната истрајност, силното чувство на припадност и духовното достоинство, пренесувани низ генерациите како печат на еден народ што умеел и успеал да си го сочува националниот интегритет и дигнитет во тешки времиња на војни, страдања и преселби.“
Таа ја истакна и уставно-правната позиција на заедницата во земјава, оцена која ја нагласува инклузивноста на државниот систем.
„Треба да сме горди како единствената држава во којашто Власите се уставен етнички ентитет, рамноправен со другите и еднаков во уживањето на индивидуалните и колективни права. Има ли поголема потврда за демократската зрелост на македонскиот политички систем, како и за инклузивноста на македонското општество кон сите заедници?“
На крајот од својата честитка, претседателката упати благодарност за континуираниот придонес на Власите во македонското општество.
„Со својот сестран општествен придонес, Власите оставија и продолжуваат да оставаат небришливи траги на секое поле! Нека е честит 23 Мај, Националниот ден на Власите! Вечен да е!“