Претседателката и врховен командант на вооружените сили, Гордана Сиљановска-Давкова, денеска на армискиот полигон „Криволак“ присуствуваше на завршницата од големата воена вежба „Блесок 26“, која се реализираше од 19 до 27 април како дел од програмата на НАТО.
Централен настан на вежбата беше тактичката операција „Воведување на лесна пешадиска баталјонска група (ЛПБГ) во офанзивни операции“, преку која македонските војници ги демонстрираа своите капацитети, знаење и дисциплина. Претседателката истакна дека добиените највисоки оценки за борбената готовност на оваа група не се случајни, туку се резултат на макотрпна работа која ја профилира Македонија како рамноправен и кредибилен член на Алијансата.
„Живееме во време на драматични геополитички превирања и на правен вакуум. Се случи незамисливото, војна на европско тло, Блискиот Исток продуцира светска нестабилност, а сајбер-просторот прерасна во конфликтна арена. Во такви околности, државите мора да се фокусираат на градење силни, стабилни и отпорни институции подготвени за брза реакција“, порача Сиљановска-Давкова во своето обраќање.
Таа додаде дека вежбата, во која учествуваа над 1.500 припадници, не е само воена проверка, туку и јасен израз на меѓусебната доверба и цврстината на сојузништвото во НАТО.
На настанот присуствуваа и се обратија министерот за одбрана Владо Мисајловски, началникот на Генералштабот на Армијата, генерал-мајор Сашко Лафчиски, како и високи претставници на НАТО – контраадмиралот Торстен Маркс (началник на Ј-9 во Неапол) и генерал-потполковник Григориос Боунтлиакис (командант на НАТО корпусот за брзо распоредување од Грција).