Претседателката Гордана Сиљановска-Давкова денеска присуствуваше на свеченото отворање на Светскиот самит за влади (World Governments Summit 2026) во Дубаи. Станува збор за една од највлијателните глобални платформи за дијалог и визии за иднината на управувањето, каде се разменуваат искуства за клучните предизвици.
„Самитот обединува светски лидери, носители на одлуки и експерти во заедничка потрага по иновативни решенија за најголемите глобални предизвици. Ова е простор за зајакнување на меѓународната соработка“, истакна претседателката на својот Фејсбук профил.
Годинашната тема на самитот, „Обликување влади на иднината“, ги собра на едно место претставниците на над 150 држави, меѓу кои десетици шефови на држави и стотици министри, со цел да се создаде поодржлив и поефикасен глобален систем на управување.