Кинескиот претседател Си Џинпинг во телефонски разговор со американскиот претседател Доналд Трамп изјави дека „враќањето“ на Тајван во рамките на Кина е клучен елемент од повоениот меѓународен поредок, соопшти кинеската државна агенција Ксинхуа.
„Кина и САД некогаш се бореа рамо до рамо против фашизмот и милитаризмот, а сега треба да соработуваат за да ги заштитат резултатите од Втората светска војна“, го цитираше агенцијата претседателот Си. Од Белата куќа потврдија дека разговор се одржал, но не открија дополнителни детали.
Пекинг го смета Тајван како составен дел од својата територија и не ја исклучува употребата на сила за да воспостави контрола врз островот. Тајпеј, пак, го отфрла ова тврдење и истакнува дека иднината на Тајван може да ја одлучи единствено неговиот народ.
Тензиите растат и со Јапонија. Кина се соочува со најголема дипломатска криза со Токио во последната деценија, откако јапонската премиерка Санае Такаичи изјави дека евентуален напад врз Тајван би можел да предизвика воен одговор од Јапонија.
Си и Трамп се сретнаа во Јужна Кореја на 30 октомври, по месеци трговски тензии предизвикани од политиките за царини на САД. По средбата, Кина продолжи да купува американска соја и го стопира проширувањето на ограничувањата за извоз на ретки минерали, додека САД намалија дел од царините за кинеските производи.
Си оцени дека билатералните односи се стабилизирале: „Фактите уште еднаш покажуваат дека двете страни имаат корист од соработката, а дека конфликтот им штети и на двете“, му порача тој на Трамп, повикувајќи ги двете држави да го задржат позитивниот моментум и да ја прошират соработката.
Лидерите разговараа и за војната во Украина, при што Си ја повтори поддршката на Кина за сите напори за мир и ги повика сите страни да ги решат недоразбирањата.