Нападот врз младите во Ново Село е кривично дело што се гони по службена должност и Јавното обвинителство е должно да постапи веднаш, но наместо тоа одлучи да молчи, обвинуваат од опозициската СДСМ.
Кети Штерјова од СДСМ на денешната прес-конференција истакна дека иако има јавни изјави и познати имиња, реакција од правосудните органи сè уште нема.
„Нападот врз младите во Ново Село е кривично дело што се гони по службена должност. Според Законот за кривичната постапка, Јавното обвинителство е добро да постапи штом има сознание – не мора да чека никого да поднесе пријава. Има сознание. Има јавни изјави. Има барања. Има имиња. А Обвинителството – молчи. Државниот јавен обвинител Савески е на „екскурзија“. Тој и онака ретко се јавува кога народот бара правда. Се јавува само кога ќе го повика Мицкоски – преку медиуми, од собраниска говорница или директно по телефон. Кога граѓаните бараат заштита, Савески или не се јавува, или е на екскурзија и не може“, изјави Штерјова.
Од партијата посочуваат дека од групата што учествувала во инцидентот веќе се познати барем две лица.
„Во меѓувреме, од десетиците што учествуваа во нападот, веќе се познати барем двајца: • Петар Марков – пратеник на ВМРО • Наско Димитриев – член на ВМРО и возач на градоначалникот. Едниот е пратеник. Другиот е човек близок до локалната власт на ВМРО. А Обвинителството сè уште „не знае“ кој ги нападна младите“, додаде Штерјова.
Според СДСМ, ваквото постапување претставува селективно делење на правдата и заштита на лица од владејачката структура.
„Ова е свесно одбивање да се заштитат граѓаните кога насилниците се од владејачката структура. Додека Савески е на екскурзија, а Мицкоски на своја, младите остануваат без заштита, а насилниците – без одговорност. Доаѓа време кога и ова ќе мора да се објасни“, заклучи Штерјова.