Саудиска Арабија ги прекина испораките на сурова нафта до европските рафинерии поради оштетувањето на клучниот саудиски нафтовод до Црвеното Море во напади со беспилотни летала. Ова предизвика итно барање алтернативни извори на снабдување и нови нарушувања на европскиот пазар на енергенси.
Ниту еден танкер за нафта не исплови од саудиското пристаниште Јанбу кон Европа од 11 септември. Зад нарушувањето стои затворањето на нафтоводот Исток-Запад, преку кој се транспортираше нафта со цел да се заобиколи Ормутскиот теснец. Нафтоводот беше затворен по нападот од 10 септември, за кој Саудиска Арабија ги обвинува ирачките милиции.
Овој прекин создаде сериозни проблеми за европските рафинерии, кои се потпираат на оваа нафта по воведените санкции кон Русија. Најмалку три рафинерии останаа без закажани испораки за септември, а некои се одложени дури до ноември. Полскиот нафтен гигант „Орлен“, кој покрива околу 40 отсто од потребите со саудиска нафта, интензивно купува резерви од Северното Море и САД.
Пазарот реагираше со нагло зголемување на цените. Додека фјучерсите за сурова нафта Брент се тргуваат по околу 108 долари за барел, референтната цена на физичкиот барел во Европа достигна 122 долари, што укажува на премијата што рафинериите ја плаќаат за итна достапност.
Доколку прекинот продолжи, европските купувачи ќе се соочат со поскапи алтернативи, што може да изврши дополнителен притисок врз цените на горивата и да ги зголеми трошоците за крајните потрошувачи.