Шести ден од потрагата по Данка, полицијата ги проверува фејсбук профилите на мајката

Веќе шести ден се трага по 2-годишната Данка од Србија, од која нема ни трага ни глас.

Девојчето исчезна во вторникот попладне во Бањско поле кај Бор.

Полицијата покрај телефонот, врши увид и во социјалните мрежи и контактите на Ивана Илиќ – мајката на исчезнатото двегодишно девојче во Србија, јавуваат српските медиуми.

Полицијата, пожарникарите, како и локалното население и бројни доброволци ја пребаруваат областа во потрага по девојчето. Вклучени се и кучиња трагачи.

Багери, полиција и пожарникари со денови го расчистуваат дворот и просторот околу дворот каде последен пат била видена Данка. Исто така, проверени се и каналите околу дворот.

Два хеликоптери вчера во текот на целиот ден го обиколија теренот на мала надморска височина, а можеше да се слушне и како моторната пила се користи за расчистување на теренот. Забележани се и полицајци со лопати, а на целата област има тензија дали е пронајдена трага која може да доведе до малото девојче.

Според неофицијални информации, се проверуваат и Фејсбук профилите на Ивана Илиќ.

„Мајката има неколку профили на Фејсбук, се проверуваат сите пораки што ги праќала и примала во претходниот период. Исто така, наводно се проверува и нејзината комуникација со луѓе од Ниш и Зрењанин. Засега нема официјални информации, ниту детали за проверката на нејзините профили на социјалните мрежи, ниту дали има нешто што се коси со истрагата“, вели извор близок до истрагата за „Информер“.

Според одредени српски медиуми, спорна е содржината на телефонот на Ивана, која наводно бришела пораки на денот на исчезнувањето на малото девојче.