Шахпаска: Секој има право на достоинствен живот
Министерката за труд и социјална политика Јагода Шахпаска по повод 1 Март – Денот на нула дискриминација порачува дека секој има право на достоинствен живот без оглед на возраст, пол, расна и етничка припадност или убедување.
Во видео пораката, Шахпаска посочува дека Владата и Министерството за труд и социјална политика направиле сериозен исчекор во борбата против дискриминацијата.
– Преку широка и отворена дебата успеавме да го усвоиме Законот за спречување и заштита од дискриминација. Законот јасно ги дефинира основите на дискриминација согласно Меѓународните конвенции и Европската регулатива. За прв пат како дискриминаторски основи ги вклучивме и сексуалната ориентација и родовиот идентитет, како дел од основните човекови права и слободи, вели Шахпаска.
Таа ја потенцира транспарентната постапка за избор на Комисијата за спречување и заштита од дискриминација, која има задача ефикасно, објективно, независно и принципиелно да работи во интерес на граѓаните.
– Градиме еднакво општество за сите, водени од тоа дека секој има право на достоинствен живот без оглед на возраст, пол, расна и етничка припадност или убедување. Секој човек е различен и секој човек има право на избор. Впрочем, убавината на општеството ја прават различностите, истакнува министерката Шахпаска во видео пораката.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа