Серија апсења спречија терористички напад во Белгија, некои се познати исламисти

Белгиската полиција уапси осум лица во антитерористички рации во земјата со цел да се спречат можни напади, соопшти денеска федералното Обвинителство.

Полицијата во Антверпен, синоќа, на барање на истражниот судија, изврши пет претреси во Мерксем, Боргерхаут, Деурн, Синт-Јанс-Моленбек и во Еупен.

Од Обвинителството соопштија дека во таа пригода уапсени се пет лица, но не објавија детали за тоа што е пронајдено.

„Најмалку двајца се осомничени дека планирале терористички напад во Белгија. Целта на нападот сè уште не е утврдена“, соопшти Обвинителството.

Во меѓувреме, полицијата во Брисел изврши претреси во блиските градови Завентем, Моленбек-Сен Жан и Шарбек и уапси три лица.

„Овие луѓе исто така се осомничени дека планирале терористички напад во Белгија. Има врски меѓу двата случаја, но понатамошната истрага ќе треба да открие до кој степен тие биле испреплетени“, соопшти канцеларијата на Обвинителството.

Апсењата доаѓаат додека во Белгија им се суди на осомничените членови на ќелијата што ги изврши најсмртоносните напади на белгиска територија пред 22 март 2016 година. Тој ден 32 лица го загубија животот на главниот белгиски аеродром и на централната линија на градското метро, ​​а речиси 900 беа повредени или претрпеа психичка траума.

Обвинетите се соочуваат со обвиненија што вклучуваат убиство, обид за убиство и членство или учество во дејствија на терористичка група. Меѓу обвинетите е Салах Абдеслам – единствениот преживеан меѓу екстремистите на Исламската држава, кој во 2015 година во Париз изврши напад врз театарот „Батаклан“, градските кафулиња и на националниот стадион на Франција.

Поради злосторството во француската престолнина, тој веќе е осуден на доживотен затвор, без можност за условно ослободување.