По реакциите во јавноста по нејзиното претставување во Собранието, Џихан Ахмед ја повлече кандидатурата за член на Комисијата за спречување и заштита од дискриминација. Информацијата ја потврдија за МИА од Коалицијата Вреди.
Најостри забелешки за кандидатурата дојдоа од Мрежата за заштита од дискриминација, од каде побараа Собранието да не ја избере Ахмед, оценувајќи дека таа не ги исполнува законските услови предвидени во Законот за спречување и заштита од дискриминација. Како што наведоа, Ахмед нема ниту една година работно искуство во областа на човековите права, а особено во доменот на еднаквост и недискриминација.
Иако се претстави како магистер по меѓународно право и настапи со цел да ја образложи својата мотивација и компетентност во областа на човековите права, за време на расправата во Собранието таа, според критиките, не успеа да покаже основно познавање на Истанбулската конвенција – клучен меѓународен документ за заштита на жените од родово базирано насилство и дискриминација.