Поради излевање на реката Вардар од синоќа, воведена е забрана за сообраќај на регионалниот пат Р2-233 на делницата Гостивар – село Чегране, поточно низ село Форино. Сообраќајот се пренасочува преку село Старо Чајле кон село Форино. Патниот правец кон село Герман е непрооден кај село Станча поради паднато дрво, информира Авто Мото Сојуз на Македонија (АМСМ) во утринскиот билтен за состојбата на патиштата.
На останатите државни патишта сообраќајот се одвива по влажни коловози. Слаб снег провејува на делниците Крива Паланка – граничен премин Деве Баир, кон граничниот премин Делчево, како и во Страцин и на Пониква, но засега не предизвикува пречки во сообраќајот.
Интензитетот на сообраќај надвор од урбаните средини е умерен, а на граничните премини од македонска страна нема подолги задржувања за влез и излез од државата.
Од АМСМ апелираат возачите да ја прилагодат брзината на движење, да ја почитуваат поставената сигнализација и да управуваат внимателно, особено низ котлини, речни долини и клисури каде е можна појава на одрони. Посебна претпазливост се препорачува на делниците Катланово – Велес, Маврово – Дебар – Струга, Виница – Берово и Кочани – Делчево.
Воедно, потсетуваат дека и понатаму е на сила законската обврска за задолжително поседување зимска опрема во возилата.