СДСМ: Сега е моментот за одлука и забрзување на евроинтеграциите

Како дел од караванот „Рамо до рамо до победа“ денеска со граѓаните на општина Кавадарци беше членот на ЦО Оливер Спасовски, а портпаролката на СДСМ Богданка Кузеска заедно со Милена Стевановиќ оствари средби со граѓаните на општина Кичево.

Спасовски пред граѓаните на Кавадарци истакна дека е добро што започна дијалог со опозицијата, додавајќи дека сега е време за одлука за усвојување на уставните измени и забрзување на европскиот пат на државата.

-Ова се одлуки за иднината на државата и граѓаните, ова не го правиме заради Владата или партијата, туку за државата и за иднината на генерациите пред нас.  Ова е момент за забрзување на евроинтеграциите и секоја партија треба да одлучи. Треба да го искористиме моментот и да донесеме одлуката. Изборот е дали ќе одиме во интеграција во ЕУ или во изолација, рече Спасовски, додавајќи дека ДПМНЕ се однесува непринципиелно и ги менува ставовите.

За европската иднина на државата во Кичево зборуваше и портпаролката на СДСМ Богданка Кузеска, која нагласи дека државата како никогаш досега има силна меѓународна поддршка за членство во ЕУ со признаен македонски јазик и идентитет.

Последен доказ за тоа е Резолуцијата усвоена во германскиот Бундестаг, со која се потврдува македонската култура, идентитет и јазик, како дел од европското културно наследство, истакна Кузеска, додавајќи дека ДПМНЕ не направи ништо и не лобираше кај своите сестрински партии во Германија да ја поддржат резолуцијата.

СДСМ покажа државнички капацитет и подаде рака за дијалог. Мицкоски и ДПМНЕ променија став, веќе не се против уставни измени, прифаќаат учество во заедничка Влада и признаваат легитимитет на Собранието да ги донесе уставните измени. Дијалогот треба да продолжи. Сега на Мицкоски и опозициската ДПМНЕ е да покажат дали се интеграција во ЕУ, порача портпаролката на СДСМ Богданка Кузеска во Кичево.