СДСМ: Градоначалникот Бобан Стефковски од ВМРО-ДПМНЕ ги прекршил законите
Градоначалникот на општина Гази Баба, назначил лице без лиценца за ревизор, без положен испит, извесен Добри Петров, в.д. директор на Јавното комунално претпријатие Гази Баба. Со ова е прекршен Член 36 од Законот за јавна внатрешна финансиска контрола, обвинуваат утрово од владејачката СДСМ во писмена реакција испратена до медиумите.
Ова неовластено лице, велат од партијата, исто така било незаконски задолжено да изврши ревизија на работата на детската градинка „Детска Радост“.
„Лицето кое незаконски вршело ревизија, ревизорскиот извештај, согласно Законот наместо да го достави прво кај директорката на градинката, го доставил до градоначалникот, која врз основа на овој незаконски извештај е разрешена.
Целта на оваа незаконска операција била разрешување на директорката на градинката.
ВМРО-ДПМНЕ и Стефковски треба да објаснат како в.д. директор на јавно претпријатие Гази Баба го назначиле незаконски да спроведува партиски наредби.
ВМРО-ДПМНЕ за само 100 дена си го покажа вистинското лице. Нивните градоначалници владеат со општините како шерифи, не почитуваат закони, разрешуваат и именуваат свои партиски војници.
Законите се јасни и тие се прекршени со постапките на Стефковски и затоа очекуваме надлежните институции да покренат соодветни законски процедури за овој скандал“, стои во реакцијата на СДСМ.
28.02.2022 - 09:47
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
