Поминаа 50 дена од објавата на првите скандали и „бомби“ од страна на антикорупцискиот тим на СДСМ, но досега нема никаква реакција од ниту една надлежна институција. Ова го истакна портпаролката на СДСМ, Богданка Кузеска, обвинувајќи дека гласот не допира до Обвинителството, ДКСК и Финансиската полиција за милионските скандали на, како што рече, „тендер-коалицијата ВМРО-ЗНАМ“.
Кузеска потсети на серијата објавени случаи за кои тврди дека се поткрепени со факти и докази:
- Сомнителни тендери: Фирма основана во 2024 година, без историја и со само двајца вработени, добила тендери од 9 милиони евра. Исто така, фирма со тројца вработени добила тендери од 1,2 милиони евра.
- Семејни врски: Семејна фирма на Томовски добила 161 тендер во вкупна вредност од 5,3 милиони евра.
- Случај „Пошта“: Објавени се документи од свиркачи за тендер од 1,2 милиони евра доделен на фирма блиска до ЗНАМ.
- „Пирамид билдинг“: Оваа фирма, поврзана со член на Избирачки одбор на ВМРО-ДПМНЕ, добила 51 тендер од општините во вредност од 16 милиони евра. Според СДСМ, оваа мрежа води директно до кабинетот на премиерот Мицкоски и Владимир Нелоски.
- Банкарски скандал: Сомнителен капитал влегува преку Алта банка, иако ЕЦБ забранила влез во ЕУ поради сомнежи за перење пари, а во банката има структура на ВМРО.
„Затоа власта презема контрола врз судството и обвинителството во обид да се спаси од одговорност за криминалните тендери“, заклучи Кузеска.