Еден ден по предупредувањето на Владимир Путин дека Европа ризикува војна со Русија, генералниот секретар на НАТО, Марк Руте, излезе пред новинарите во Брисел со низа остри и директни пораки. Тој зборуваше за руските закани, поддршката за Украина и улогата на САД во можните мировни преговори.
Руте порача дека состанокот на министрите на НАТО е „јасен знак дека Путин греши“.
„Путин верува дека може да издржи подолго од нас, но ние не одиме никаде“, истакна тој, додавајќи дека помошта на Алијансата има суштинско влијание на теренот, особено во однос на системите за противвоздушна одбрана.
Тој предупреди дека опасностите што доаѓаат од Русија се „реални и трајни“, споменувајќи ги сајбер-нападите и упадите во воздушниот простор на членките на НАТО. Според Руте, потребна е „непоколеблива будност“, а сојузниците остануваат посветени на целта – до 2035 година да издвојуваат 5% од БДП за одбраната.
Во врска со саботажите што ѝ се припишуваат на Русија, како експлозијата на железничката пруга во Полска, Руте ги нарече нападите „крајно неодговорни“. Тој наведe дека разузнавачките служби ќе ги утврдат сите детали, но додаде: „Ќе реагираме на начин што самите ќе го одбереме – и тие ќе го почувствуваат тоа“.
Руте оцени дека само Доналд Трамп може да ја деблокира моменталната застојна состојба во мировните преговори, пофалувајќи ја улогата на неговиот тим. Не сакаше да коментира дали Русија покажала поголема подготвеност за компромис, но подвлече дека НАТО мора да ја продолжи стратегијата на притисок – преку вооружување на Украина и економски мерки кон Москва.
Тој истакна дека Русија троши 40% од буџетот на одбраната, поради што НАТО мора да одговори со сопствено зајакнување. Прашањата за мобилизација или вклучување жени во одбраната, според него, остануваат во надлежност на секоја земја-членка.
Говорејќи за програмата ПУРЛ за набавка на оружје за Украина, Руте рече дека две третини од сојузниците веќе се приклучиле и дека распределбата на товарот значително се подобрува. Сојузниците, нагласи тој, обезбедуваат „постојан проток на оружје“ што создава дополнителен притисок врз Русија.
Руте изрази уверување дека Европската Унија ќе го реализира планот за користење на замрзнатиот руски имот за финансирање на Украина, по најавата на Урсула фон дер Лајен за пакет вреден 79 милијарди евра. Доколку тоа не се оствари, додаде, „ќе треба да најдеме пари на друг начин“, потенцирајќи ја својата целосна доверба во европското раководство.