Голем дел од европските граѓани се загрижени дека ризикот од војна со Русија е висок, покажува истражување спроведено во девет земји-членки на Европската Унија, објавено денеска од франциското списание „Ле Гран Континан“.
Повеќе од половина (51%) од анкетираните сметаат дека постои „висок“ или „многу висок“ ризик Русија да влезе во војна со нивната земја во наредните години. Истражувањето било спроведено меѓу 9.553 лица со помош на квотен метод.
Истражувањето се одвивало кон крајот на ноември од институтот „Кластер 17“ (Cluster 17) во Франција, Германија, Италија, Шпанија, Полска, Португалија, Хрватска, Белгија и Холандија, при што во секоја земја биле анкетирани над 1.000 лица.
Анкетата ги прашала граѓаните: „Според вас, дали е можно Русија да влезе во војна со вашата земја во следните години?“
Перцепцијата на ризикот варира во зависност од земјата. Во Полска, која граничи со Русија и Белорусија, 77% од анкетираните го сметаат овој ризик за висок или многу висок. Во Франција бројката е 54%, а во Германија 51%.
За разлика од Полјаците, 65% од анкетираните Италијанци го сметаат ризикот за низок или непостоечки.
Истражувањето исто така покажува дека 81% од анкетираните не веруваат или речиси не веруваат дека во наредните години ќе избувне војна со Кина.
„Следствено, Русија претставува, со голема разлика, најсериозната закана за војна според европското јавно мислење,“ анализира геополитичкото издание „Гран континан“.
Ако Русија е најголемата државна закана, тероризмот се перципира како најнепосредна закана. Во деветте земји опфатени со истражувањето, 63% од анкетираните го сметаат ризикот од отворена војна со терористички организации за „висок“ или „многу висок“.
Анкетираните се сомневаат и во воените способности на својата земја против Москва. Повеќе од две третини (69%) сметаат дека нивната земја „воопшто не е“ или „првенствено не е“ способна да се одбрани од руска агресија. Во Франција, единствената земја од списокот која располага со нуклеарно оружје, 44% сметаат дека земјата е „целосно“ или „првенствено“ способна да се одбрани.
На спротивниот крај се Белгијците, Италијанците и Португалците, каде поголемиот дел сметаат дека нивната земја е неспособна да се одбрани (соодветно 87%, 85% и 85%).
Истражувањето ги опфаќа и други теми: 55% од анкетираните сметаат дека Европа треба да заземе балансирана позиција меѓу САД и Кина.
Речиси половина (48%) го сметаат Доналд Трамп за „еден од најлошите претседатели во историјата на САД“, со разлики по земји.
Поголемиот дел од Европејците ја перципираат имиграцијата како „закана за единството на земјата“, особено во северниот и источниот дел на континентот.
Дополнително, Европејците го поддржуваат намалувањето на јавните трошоци и бројот на државните службеници.