Родителите на загинатите во пожарот во дискотеката „Пулс“ ја менуваат стратегијата во својата борба за правда. Наместо секојдневни блокади, тие ќе продолжат со маршеви кои ќе се одржуваат секоја сабота, со цел јавноста да не заборави на трагедијата и да се одржи притисокот врз институциите.
Од здружението на родителите велат дека протестите нема да запрат, но ќе се одвиваат на поинаков начин, со почитување на јавниот ред и мир. Како што нагласуваат, нивната цел не е да создаваат метеж, туку да ја потсетат јавноста дека правдата сè уште не е задоволена и дека одговорност мора да има.
Главната расправа за случајот „Пулс“ е закажана за 19 ноември, а семејствата на жртвите најавуваат дека ќе присуствуваат и ќе го следат судскиот процес со големо внимание. Тие повторно апелираат до судските органи да го водат процесот транспарентно и без одлагања, со единствена цел – да се расветли вистината за трагедијата што ги зави во црно десет македонски семејства.