Не е точно тврдењето на државниот обвинител Савески дека предметот „Талир 2″ ќе беше во мое надлежно постапување доколку не поднесов оставка, вели поранешната обвинителка Ленче Ристоска по изјавата на републичкиот јавен обвинител, Ненад Савески дека доколку не си поднела оставка, предметот „Талир 2” ќе бил во нејзини раце.
-Како обвинител за врски, согласно член 5 од Правилникот за предлагање и упатување на јавен обвинител за врски на Република Северна Македонија во Европравда, по правило можев да постапувам по предмети регистрирани и во надлежност на Канцеларијата за врски, а по исклучок, врз основа на одлука на државниот јавен обвинител, и по предмети по кои претходно сум постапувала. Предметот „Талир 2″ не е предмет во надлежност на Канцеларијата за врски — во него постапував токму по тој исклучок, врз основа на одлука на државниот јавен обвинител. Со повлекувањето на тоа овластување отпадна и правниот основ по кој постапував во овој предмет, вели Ристоска.
Во објавата на Фејсбук тврди и дека лично го информирала Савески за ова и најавила оставка доколку овластувањата ѝ бидат повлечени.
-Оваа информација му беше соопштена на обвинителот Савески лично од мене, на состанок пред да ја поднесам оставката. Лично го известив и дека доколку ги повлече овластувањата по предметите по кои постапувам, ќе следи мојата оставка, а ги објаснив и причините за таквата одлука. Така што, неспорно е дека мојата оставка беше моја одлука — но таа, меѓу другото, беше последица на одземањето на основот да ги работам предметите, вели Ристоска.
Савески претходно во изјава по седница на Советот на јавни обвинители рече дека повлечените овластувања се однесувале на постапување на обвинителите во предмети кои не биле под навлежност на своето обвинителство. Во случајот со Рисоска, според него, „Талир 2“ бил под надлежност на ОЈО Скопје.
-Токму овој предмет, доколку таа не поднесеше оставка, ќе беше во нејзино надлежно постапување. Во овој предмет моето повлекување на овластувањата никако не можеше да се смета дека имало последица да ѝ биде одземен предметот. Доколку останеше, таа ќе работеше на овој предмет. Одлуката на обвинителката Ристоска да поднесе оставка беше нејзина лична одлука, рече Савески.