Премиерот Христијан Мицкоски и лидерите на земјите од Западен Балкан во Њујорк остварија средба со високата претставничка на Европската Унија за надворешна политика и безбедност, Каја Калас.
На средбата биле разменети мислења за актуелните регионални предизвици, можностите за продлабочување на соработката и заедничките приоритети насочени кон стабилен, безбеден и просперитетен регион, објави Мицкоски на Фејсбук.
Македонскиот премиер, кој учествува на Генералното собрание на Обединетите нации во Њујорк, претходно учествуваше и на состанокот на лидерите на Европската Унија и Западен Балкан.
Во рамки на посетата, Мицкоски оствари средби и со хрватскиот премиер Андреј Пленковиќ и со премиерот на Косово, Албин Курти.
Тој учествуваше и на панел-дискусијата на високо ниво „Reaffirming the promise of peace: using the power we have“, чиј домаќин беше претседателот на Финска, Александар Стуб. На панелот се разговарало за значењето на мирот, дијалогот, одговорното лидерство и улогата на државите и меѓународните институции во справувањето со глобалните предизвици.
Мицкоски оствари и одделна средба со претседателот Стуб, на која, како што информира, било истакнато значењето на почитувањето на меѓународното право, силната мултилатерална соработка и градењето стабилна и безбедна Европа.
„Македонија останува посветен партнер во напорите за мир, стабилност и соработка, како членка на НАТО и земја стратешки определена кон европската интеграција“, напиша Мицкоски на Фејсбук.