Собранието ги разреши министрите кои се опфатени со реконструкцијата на владиниот кабинет и на чие место треба да дојдат кадрите што ги предложи премиерот Христијан Мицкоски по разговорите со коалициските партнери – ЗНАМ и Влен.
Разрешувањето на министрите за правда; за односи меѓу заедниците; за земјоделство, шумарство и водостопанство; за здравство; за социјална политика, демографија и млади, за локална самоуправа; за култура и туризам и еден министер без ресор, беше прва точка во рамките на денешната 112. седница, на која на дневен ред е реконструкцијата на Владата.
Сите министри кои веќе не ја вршат оваа функција беа разрешени со двотретинско мнозинство гласови, иако за разрешувањето беше потребно апсолутно мнозинство, односно за предлогот да гласаат најмалку 61 пратеник.
Еве како се гласаше поединечно во собраниската сала:
- Игор Филков од функцијата министер за правда беше разрешен со 83 гласа „за“, без „против“ и воздржани.
- Иван Стоиљковиќ од министер за односи меѓу заедниците беше разрешен со 95 гласа „за“.
- Цветан Трипуновски, кој раководеше со земјоделство, со 92 гласа „за“.
- Азир Алиу – неговото разрешување го поддржаа 80 пратеници, додека тројца беа против, а имаше и тројца воздржани.
- Фатмир Лимани од министер за социјална политика „за“ гласаа 85 пратеници, а еден беше против.
- Златко Перински од министер за локална самоуправа го поддржаа 87 пратеници.
- Зоран Љутков, кој беше на чело култура и туризам, 91 пратеник.
- Шабан Салиу е разрешен од функцијата министер без ресор со 85 гласа „за“.
Од разрешените министри само еден ќе се врати во владата со ново портфолио. Станува збор за Иван Стоилковиќ, кој од министер за односи меѓу заедниците ќе го заземе ресорот локална самоуправа. Златко Перински, кој е разрешен од овој ресор, треба да го заземе директорското место во Фондот за здравствено осигурување (ФЗО), чиј прв човек Сашо Клековски е предложен за министер за здравство, на местото на разрешениот Азир Алиу.