Албанија нема да го искористи правото на вето против Северна Македонија во процесот на пристапување кон Европската Унија, дури и ако претходно стане членка на Унијата.
Ова го порача албанскиот премиер Еди Рама, одговарајќи на прашање на студент од Скопје за време на младинскиот камп „RinCamp 2026“ во Јал, каде што учествуваат и млади од Северна Македонија. Рама истакна дека со години се спротивставува на користењето на ветото во процесот на проширување, оценувајќи дека таквиот механизам не придонесува за европската интеграција, туку создава нови политички блокади.
„Албанија нема да му наметне вето никому и никаде. Имаме целосен интерес работите во Северна Македонија да се развиваат што е можно подобро. Исто така, ни е важно односите меѓу Македонците и Албанците да бидат братски и да се темелат на хармоничен соживот“, порача Рама.
Тој оцени дека демократскиот развој не е линеарен процес, туку пат исполнет со предизвици, подеми и падови, додавајќи дека Албанија го посакува најдоброто за Северна Македонија и нејзината европска перспектива.
Во своето обраќање повторно ја критикуваше практиката на користење вето во евроинтегративниот процес, нарекувајќи ја „заложнички механизам“ кој, според него, е неконструктивен и спротивен на духот на европското обединување.
Рама се осврна и на потребата од поинаков пристап на Европската Унија кон земјите кандидати. Според него, државите што сè уште не се членки треба порано да бидат вклучени во европските процеси на одлучување, посочувајќи дека Планот за раст на ЕУ веќе отвора простор за такви промени.
„Политички, Европа треба да се обедини сега, а потоа секоја земја да ја исполни својата должност“, рече албанскиот премиер.
Осврнувајќи се на положбата на Албанците во регионот, Рама оцени дека денес тие се наоѓаат во најповолна позиција во својата понова историја и повика тој напредок да се зачува и понатаму.