Две лица се убиени, а едно е тешко повредено во пукотница во близина на основно училиште во градот Смржовка во округот Јаблонец во Чешка.
Полицијата соопшти дека еден маж и една жена се убиени, а осомничениот е уапсен и однесен во болница со хеликоптер, објави чешкиот весник „Новинки“.
„На местото на настанот е пронајдено оружје. Сите околности на инцидентот се предмет на понатамошна истрага“, изјави портпаролката на полицијата Клара Јеничкова.
Таа додаде дека пукотницата се случила во непосредна близина на локално основно училиште.
„Полицијата ги презеде потребните мерки и ги извести луѓето во областа да не излегуваат. Во овој момент, веројатно е само случајност што инцидентот се случил во близина на училиштето и нема никаква врска со таа институција“, рече таа.
Специјалните сили, како и амбулантните возила и пожарникарите, исто така, интервенираа на местото на настанот.