Центарот на Атина беше потресен од вооружен инцидент во кој повеќе лица се ранети, а грчката полиција е во интензивна потрага по напаѓачот. Според информациите од „Скај њуз“, сторител на нападот е 89-годишен маж.
Првиот инцидент се случил во канцеларија на службата за социјално осигурување во атинската населба Керамеикос. Напаѓачот отворил оган и ранил еден вработен во ногата. Повредениот веднаш бил пренесен во болница и, според првичните информации, е надвор од животна опасност.
Кратко потоа, се верува дека истиот напаѓач пукал и во приземјето на судска зграда во Атина. При овој инцидент се повредени уште неколку лица, од кои најмалку три се судски службенички, кои се здобиле со полесни телесни повреди.
Мотивот за овој чин засега останува непознат. Сведоци на настанот тврдат дека по пукањето, напаѓачот оставил документи за кои навел дека ја објаснуваат причината за неговите постапки. Полициските екипи се на терен и работат на целосно расчистување на случајот и пронаоѓање на осомничениот.