Планот на албанската влада за реализација на луксузен туристички проект вреден 1,4 милијарди евра, поддржан од Џаред Кушнер, зет на американскиот претседател Доналд Трамп, предизвика сериозни реакции во Европскиот парламент. Дел од европратениците предупредуваат дека овој чекор може да го забави или целосно да го загрози патот на Албанија кон ЕУ.
Најголеми критики предизвика најавената изградба на ексклузивни комплекси на островот Сазан и на полуостровот Звернец, кој се наоѓа во заштитеното подрачје на лагуната Вјоса-Нарта, позната по својата богата флора и фауна.
Поради ова, низ Албанија веќе со недели траат масовни протести, во медиумите наречени „фламинго револуција“, каде демонстрантите бараат оставка од премиерот Еди Рама поради загрозување на природните ресурси.
Шефот на делегацијата на Европскиот парламент во Албанија, холандската европратеничка Тинеке Стрик, за „Гардијан“ изјави дека тиранските власти преземаат огромен политички ризик и дека градењето во заштитени зони не е во согласност со европските еколошки стандарди.
Според Стрик, доколку Албанија сака да го задржи својот кредибилитет во процесот, премиерот Рама треба да се откаже од проектот и да покаже дека обврските кон ЕУ се поважни од интересите на инвеститорите.
За време на нивната посета во Албанија, европратениците евидентирале дека градежните активности во Звернец веќе нанеле штета, вклучувајќи уништување на шумите и на природните песочни дини, а проектот се соочува и со обвинувања за можна корупција и нетранспарентност.
Официјална Тирана претходно најави дека има цел да ги заврши преговорите со ЕУ до крајот на 2027 година за да стане членка до 2030 година. Сепак, европските претставници порачуваат дека овој комплекс може да биде сериозна кочница, и покрај силната поддршка од албанските граѓани за евроинтеграциите.