Голем број ирански пратеници ја обвинија судската власт дека не го спроведува Законот за задолжително носење хиџаб. Дури 155 од вкупно 290 пратеници испратиле писмо до претседателот на Парламентот, во кое наведуваат дека „судството не може да биде пасивно“. Во писмото се предупредува дека недоволната контрола врз примената на законот води кон „голотија, непочитување на хиџабот и други неморални дела“.
Во Иран, терминот „голотија“ често се користи за да се опише облеката што властите ја сметаат за несоодветна.
Од Исламската револуција во 1979 година, од жените се бара во јавност целосно да ја покриваат косата. Но во последните години, особено во поголемите градови и во Техеран, се повеќе жени се појавуваат без хиџаб — тренд што властите се обидуваат да го сопрат со нови мерки и засилени контроли.