Унгарскиот премиер Петер Маѓар потпиша документ со насоки за работата на делегацијата на Унгарија во Генералното собрание на ОН, во кој Русија за првпат официјално е прогласена за закана.
Во документот се истакнува јасната поддршка за територијалниот интегритет на Украина и нејзиното право на одбрана.
Унгарија ја осудува руската воена агресија и целосно го поддржува суверенитетот и територијалниот интегритет на Украина во рамките на нејзините меѓународно признати граници, се наведува во документот.
Исто така, во официјалните насоки се нагласува дека Будимпешта го признава правото на Украина на самоодбрана.
Однесувањето на Русија претставува закана за Унгарија, Европа и светскиот поредок. Будимпешта ги поддржува сите напори што би довеле до преговори за траен мир и долгорочни безбедносни гаранции за Украина, се истакнува во насоките.
Ова претставува значителна промена по 16-годишното владеење на поранешниот премиер Виктор Орбан, за време на кое Унгарија ги ублажуваше или ги попречуваше санкциите на ЕУ против Русија. Новата централно-десничарска влада веднаш објави промена во надворешната политика и во јуни дозволи отворање на преговорите за пристапување на Киев во ЕУ, на кои Орбан две години ставаше вето.
Сепак, и покрај пресвртот во реториката, Унгарија и понатаму одбива да испорачува оружје на Киев за разлика од другите членки на НАТО. Будимпешта исто така продолжува да се спротивставува на забрзаниот пристап на Украина во ЕУ.