Премиерот Ковачевски го прочита Симболот на верата и Оче наш
Со оваа заедничка богослужба, како еден од чиновите со кој се потврдува приемот на Македонската Православна Црква – Охридска Архиепископија во литургиско единство со сите православни цркви, се потврдува и одлуката на Вселенскиот Патријарх и на Светиот патријаршиски синод на Вселенската патријаршија од 9 мај за отстранување на шизмата и за воспоставување на канонски статус на Македонската Православна Црква - Охридска Архиепископија.
За време на литургијата на премиерот Ковачевски му беше укажана чест да ги прочита Симболот на верата и молитвата „Оче наш" на македонски јазик, коишто се составен дел богослужбата во православните храмови.
Во беседата што ја одржа на крајот на Синодалната и Патријаршиската литургија, Вселенскиот Патријарх Вартоломеј, се обрати кон граѓаните од нашата земја и кон делегацијата на Владата на Северна Македонија, предводена од премиерот Ковачевски, и ја нагласи големината на дарот за верниот народ на празникот Педесетница со кој црквата во нашата земја станува еднаква со сите други во православниот свет.
Одлуката на патријархот Вартоломеј и на Вселенската патријаршија е историски настан со кој конечно се стави крај на речиси седумдесетгодишната изолација на возобновената Охридска Архиепископија во лицето на Македонската Православна Црква.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
