Собранието денеска ќе ја одржи 121. седница, на чиј дневен ред се 53 точки. Пратениците, меѓу другото, ќе расправаат и ќе гласаат за именување вицегувернер на Народната банка, повеќе ратификации, како и за Предлог-законот за пријавување и проверка на странски директни инвестиции, во прво читање.
На дневен ред е и Предлог-националната стратегија за безбедност на сообраќајот на патиштата 2026–2030 година, како и Предлог-одлуката за давање согласност на Статутот на Регулаторната комисија за енергетика, водни услуги и услуги за управување со комунален отпад.
Пратениците треба да гласаат и за именување на Арљинда Хасани Синани за вицегувернер на Народната банка на Република Северна Македонија. Местото беше испразнето по распишувањето на јавен оглас за избор на нов вицегувернер.
Во рамки на седницата ќе се разгледуваат и ратификациите на Конвенцијата за Бирото на Европската конференција за цивилно воздухопловство, Протоколот со Литванија за спроведување на Спогодбата за преземање лица кои престојуваат без дозвола, како и договорите со Словенија и Португалија за соработка во областа на одбраната.
На дневен ред се и голем број предлог-закони по скратена постапка, главно со цел усогласување со новиот Закон за високите раководители. Измените опфаќаат повеќе области, меѓу кои пензиското и инвалидското осигурување, јавните набавки, царината, здравството, земјоделството, животната средина, инспекцискиот надзор, управувањето со кризи, железничкиот систем и други.
Собранието ќе го разгледа и Годишниот извештај на Агенцијата за заштита на правото на слободен пристап до информациите од јавен карактер за 2025 година.