Министерството за внатрешни работи попладнево го соопшти комплетниот идентитет на четирите лица кои синоќа трагично ги загубија животите во страшната сообраќајна несреќа на скопската обиколница.
Меѓу загинатите е 51-годишниот првенец на Македонската опера и балет, баритонот Ристе Велков, неговиот 20-годишен син, како и уште двајца нивни млади сопатници.
Полицискиот билтен ги открива иницијалите на сите жртви од патничкото возило кои починале на самото место на судирот.
„Од здобиените повреди на местото на несреќата починал возачот Р.В. и сопатниците од неговото возило, А.В.(20), П.М.(20) и М.Ѓ.(20), сите од Скопје. Лекар од Итна медицинска помош констатирал смрт, а по наредба на јавен обвинител телата на починатите се дадени на обдукција – се наведува во полицискиот билтен.“
Катастрофалниот судир се случил во доцните вечерни часови на патниот правец помеѓу надвозникот Визбегово и клучката Мирковци.
До несреќата дошло откако камион со косовски таблички пробил заштитна ограда и директно удрил во автомобилот во кој се наоѓале скопјаните.
„Несреќата се случила синоќа во 23 часот кога помеѓу надвозник Визбегово и клучка Мирковци. Б.Б.(76) од Косово, управувајќи товарно возило – влекач „ман“ со полуприколка со косовски национални ознаки изгубил контрола над возилото и со него преминал преку металната ограда во спротивната насока на автопатот при што се судрил со патничко возило „бмв“ со скопски регистарски ознаки, управувано од Р.В.(51) од Скопје.“
Веднаш по силниот удар избувнал голем пожар кој целосно ги проголтал автомобилот и предниот дел од камионот.
На местото морале да интервенираат екипи на Бригадата за противпожарна заштита Скопје кои по повеќечасовна борба го изгаснале огнот.
„По наредба на јавен обвинител возачот Б.Б. е лишен од слобода и задржан во полициска станица. По целосно расчистување и документирање на случајот ќе биде поднесена соодветна пријава.“
Поради сложеноста на увидот и расчистувањето на изгорените возила, сообраќајот на овој дел од обиколницата беше во прекин цели шест часа.
Полицијата возачите ги пренасочуваше по алтернативни патни правци низ градот, а сообраќајот е целосно нормализиран утрово во 05:00 часот.