Германскиот државен Институт „Роберт Кох“ денеска соопшти дека од почетокот на годината до топлотниот бран од крајот на јуни, од последица на топлото време починале повеќе од 800 луѓе.
Најголемиот дел од регистрираните смртни случаи се забележани кај највозрасната категорија на граѓани.
„До 21 јуни, повеќе од 800 луѓе починаа од топлото време, од кои 500 од нив биле над 85 години. Во возрасната група помеѓу 75 и 84 години, регистрирани се 190 смртни случаи предизвикани од топлината, додека кај оние помлади од 65 години, починале околу 40, се наведува во соопштението на Институтот Роберт Кох.“
Официјалните податоци покажуваат дека поголемиот број од починатите се жени, што укажува на фактот дека во групата граѓани над 85 години има повеќе жени отколку мажи.
Надлежните предупредуваат дека статистиката за смртни случаи од топлото време најверојатно може да се промени откако ќе пристигнат резултатите за најжешкиот период.
Тоа се должи на фактот што кон крајот на јуни во Германија беше соборен претходниот рекорд од 41,7 степени Целзиусови.
Од институтот појаснија и кои се најчестите медицински причини кои доведуваат до фатален исход кај пациентите за време на летните жештини.
„Смртните случаи се предизвикани или од директен топлотен удар или како комбинација од високи температури и од постоечки болести, се истакнува во соопштението на Институтот Роберт Кох.“
За споредба со претходните периоди, изминатите години највисока смртност предизвикана од високите температури на воздухот е забележана во 2018 година, кога починаа 8.000 луѓе.