Судскиот процес за пожарот во дискотеката „Пулс“, каде минатата година животот го загубија 63 лица, вчера продолжи со сослушување на соработници на бендот ДНК.
Сведочеше 21-годишната Мартина Ристовска, која била присутна во објектот во моментот кога избувнал пожарот. Таа случајно го снимила почетокот на инцидентот на Инстаграм, но, како што објасни, го забележала тоа дури наредниот ден кога го прегледала видеото.
Според нејзините зборови, пожарот започнал на плафонот над последната прскалка од левата страна на бината. Прскалката не се запалила, туку плафонот над неа почнал да гори, што предизвикало моментална паника меѓу присутните. Мартина раскажа дека двајца обезбедувачи веднаш ѝ помогнале да излезе надвор, а откако се созела, и самата почнала да им помага на другите посетители да се евакуираат.
Таа особено го истакна храброто дејствување на обезбедувачите Лазар и Столе, нагласувајќи дека благодарение на нивната пожртвуваност бил спасен многу поголем број луѓе. Мартина оцени дека нивната интервенција била клучна за избегнување на поголема трагедија и го опиша нивниот подвиг како пример за вистинска храброст и одговорност во критична ситуација.
На рочиштето сведочеше и Кристијан Китанов, редовен посетител на клубот „Пулс“. Тој раскажа дека во моментот на пожарот настанала паника меѓу присутните и дека од плафонот почнале да паѓаат искри и црни честички. Како последица, тој се здобил со изгореници од втор степен.
Кристијан објасни дека бил извлечен од обезбедувачот Лазо и неговиот вујко, кои веднаш реагирале за да го извадат од опасната зона. Потоа, тој бил пренесен во болница за итна медицинска помош и за лекување на повредите.
Судскиот процес се одвива под засилени безбедносни мерки, во присуство на обвинетите, семејствата на жртвите и јавноста. Постапка се води против повеќе од 30 физички и три правни лица за тешки дела против општата сигурност.
Пожарот во дискотеката во Кочани избувна за време на настап на групата ДНК и се смета за една од најтешките трагедии во поновата историја на земјата. Со денешното рочиште продолжува доказната постапка со изведување сведоци предложени од Обвинителството.