Главната причина за зголемувањето на цените се мемориските чипови, но и трошоците за производство што производителите ќе им ги „пренесат“ на клиентите.
Цените на паметните телефони би можеле да се зголемат во просек за 6,9 проценти во 2026 година поради недостаток на мемориски чипови предизвикан од силната побарувачка од секторот за вештачка интелигенција (ВИ), според нова студија на Counterpoint Research.
Прогнозата е значително променета во споредба со претходната проекција во која беше најавено зголемување на цените на телефоните од 3,6 проценти, објавува CNBC.
Дополнително, глобалните испораки на паметни телефони би можеле да се намалат за 2,1 процент во 2026 година, за разлика од претходната проекција во која беше предвиден стабилен или малку позитивен раст.
Главната причина лежи во зголемувањето на цените на мемориските чипови и тесните грла во синџирот на снабдување со полупроводници.
Проширувањето на центрите за податоци со ВИ ја зголеми побарувачката за системи Nvidia, кои користат мемориски компоненти од производители како што се Samsung и SK Hynix, водечките добавувачи на меморија на глобалниот пазар.
DRAM, вид RAM меморија што се користи и во центрите за податоци со вештачка интелигенција и во паметните телефони, е особено погодена.
Поради несовпаѓањето помеѓу понудата и побарувачката, цените на DRAM нагло се зголемија оваа година, што директно се одразува на трошоците за производство на мобилни уреди.
Истражувачите велат дека компаниите веројатно ќе пренесат дел од овие трошоци на потрошувачите, што го објаснува прогнозирано зголемување на просечните цени, а кинеските производители на телефони од средна и ниска класа ќе бидат особено под притисок, се додава во студијата.